काठमाडौं । केही दिनदेखिको अविरल वर्षा र बाढीका कारण प्रसारण तथा वितरण प्रणालीमा आएको समस्याले विद्युत खपत घटेपछि अधिकांश जलविद्युतगृह कम क्षमतामा चलेका छन् । वर्षा र बाढीले विद्युतीय संरचनामा पुर्याएको क्षतिका कारण लोड नलिँदा जलविद्युतगृहको क्षमता घटाएर सञ्चालन गरिएको हो ।

देशभर नै भारी वर्षा भइरहेकाले प्रसारण तथा वितरण लाइनमा आइरहेको समस्याका कारण कालीगण्डकी ‘ए’, मस्र्याङ्दी, मध्यमस्र्याङ्दी, त्रिशूली–३ ‘ए’, चमेलिया लगायत सबै जलविद्युत केन्द्र कम क्षमतामा चलाइएको नेपाल विद्युत प्राधिकरण उत्पादन निर्देशनालयका निमित्त उपकार्यकारी निर्देशक मदन तिम्सिनाले बताए । उनले प्रसारण तथा वितरण लाइनको लोड क्षमता अनुसारमात्रै विद्युतगृहका मेसिन चलाइएको बताए ।

‘मंगलबारदेखि अविरल वर्षा भइरहेको छ,  देशभर नै प्रसारण तथा वितरण प्रणालीमा समस्या देखिएको छ । यो समस्याले जलविद्युतगृहले उत्पादन गर्ने विद्युतको पूर्ण लोड प्रणालीले लिन सकिरहेको छैन । यही कारण कम क्षमतामा विद्युतगृह चलाउनु परेको छ ।’ उनले वर्षाका कारण एसी, पंखा, कुलरलगायत विद्युतीय उपकरण नचलेकाले विद्युत मागमा कमी आएकाले पनि जलविद्युतगृहको उत्पादन क्षमता घटाउनु परेको बताए ।

प्रसारण तथा वितरण प्रणालीमा देखिएको समस्याका कारण निजी क्षेत्रका जलविद्युतगृहसमेत पूर्ण क्षमतामा चल्न पाएका छैनन् । लाइनले लोड नलिएकाले कम क्षमतामा चलाउनु भन्ने प्राधिकरणको मौखिम सूचनाका आधारमा उत्पादन घटाउनु परेको निजी ऊर्जा उत्पादकहरू बताउँछन् ।

विद्युत खपत घटेपछि कुलेखानी जलाशय चलाइएको छैन । कुलेखानी चलाउनु नपरेपछि जलाशयमा पानीको सतह बढ्दै गएको छ । बिहीबार दिउँसो २ बजेसम्म जलाशयमा पानीको सतह १५ सय २२ मिटर पुगेको तिम्सिनाले बताए ।

वर्षाका कारण गर्मी हटेपछि विद्युतको माग ह्वात्तै घटेको छ । आइतबार १३ सय ८५ मेगावाट पुगेको विद्युतको उच्च माग अहिले १ हजार मेगावाटमा झरेको प्राधिकरण भार प्रेषण केन्द्रले जनाएको छ ।

READ MORE

माथिल्लो तामाकोसीकाे कथा


Your Views
Related News