११ असोज, काठमाडौं । चीनले नाका नियमित सञ्चालन गर्न नेपालको स्वास्थ्य सुरक्षा सावधानी नपुगेको बताएको छ ।

नाका सञ्चालनपूर्व स्वास्थ्य सुरक्षाको तयारीबारे नेपाली भन्सार प्रशासनलाई पत्र पठाउँदै चीनले रसुवामा पीसीआर ल्याब राख्न र अन्य सुरक्षाको उपाय कडाइका साथ कार्यान्वयन गर्न आग्रह गरेको रसुवा भन्सार कार्यालयले जनाएको छ ।

नाकाको काममा संलग्न व्यक्तिको रसुवामै तत्काल पीसीआर परीक्षण हुने व्यवस्था गर्न तथा सामान लिएर आउने सवारी साधनको प्रभावकारी डिसइन्फेक्सन गर्न चिनिया पक्षले आग्रह गरेको रसुवाका प्रमुख भन्सार अधिकृत पुण्यबिक्रम खड्काले बताए ।

‘अहिले चीनतर्फ पहिरो गएकाले सामान आउन रोकिएको छ, तर नाका निर्बाध सञ्चालन गर्न उहाँहरुले कोभिड १९ विरुद्ध सुरक्षा प्रत्याभूति माग्नु भएको छ’ खड्काले भने । रसुवागढीबाट नजिकको पीसीआर ल्याब काठमाडौंमा रहेको जानकारी गराउँदा चिनियाँ अधिकारीहरु आश्वस्त हुन नसकेको उनको भनाइ छ ।

चीनले आग्रह गरेपछि रसुवामा पीसीआर ल्याब राख्न भन्सार विभाग मार्फत पहल थालिएको पनि उनले बताए । विभागले रसुवागढी नाका वा रसुवामा ल्याब राख्नका लागि स्वस्थ्य मन्त्रालयलाई पत्राचार गरेको जनाएको छ ।

चीनबाट सामान नेपाल भित्र्याउन सहभागी एक नेपाली श्रमिकलाई कोरोना संक्रमण देखिएपछि भदौ १७ गतेदेखि रसुवागढी नाकाबाट हुने ब्यापार चिनियाँ पक्षले रोकेको छ ।

READ MORE NEWS

कृष्ण सिटौलाको प्रश्न : नेताहरु फागुनमा नहुने महाधिवेशन किन हुन्छ भन्दैछन् ?

११ असोज, काठमाडौं । झण्डै डेढ महिना गृहजिल्ला झापा बसेका नेपाली कांग्रेसका पूर्वमहामन्त्री कृष्ण सिटौला शुक्रबार काठमाडौं आए ।

शनिबार विहान आफ्नो समूहका नेताहरुसँग परामर्श गरे, दिउँसो पार्टी सभापति शेरबहादुर देउवालाई भेट्न उनको निवास बुढानीलकण्ठ पुगे । आइतबार विहान बोहराटार पुगेर पार्टीका वरिष्ठ नेता रामचन्द्र पौडेललाई पनि भेटेका छन् । दुबैलाई भेटेपछि सिटौलाको प्रश्न छ, ‘दुबै नेता किन फागुनमै महाधिवेशन हुन्छ भनिरहेका छन् ?

कांग्रेसमा देउवा नेतृत्वको केन्द्रीय कार्यसमितिको चार वर्षे कार्यकाल २०७६ फागुनमै पूरा भएको हो । समयमै महाधिवेशन नगरी संस्थापन पक्षले बहुमतको बलमा एकैपटक एक वर्ष म्याद थप्यो र २०७७ फागुन ७ गतेदेखि १० सम्म काठमाडौंमा १४ औं महाधिवेशन गर्ने निर्णय गर्‍यो । सुरुमा विरोध गरेको पौडेल समूहले पनि पछि यो निर्णयमा सहमति जनायो, यद्यति महाधिवेशन मिति उही रहने गरी कार्यतालिका सामान्य संशोधन भयो ।

त्यो कार्यतालिकाअनुसार २०७७ साउन र भदौमा क्रियाशील सदस्यता वितरण तथा नवीकरण सकेर केन्द्रमा विवरण आइपुग्नुपर्ने हो । तर कतिपय जिल्लामा एकीकरणमा आएका पार्टीसँगको समायोजन नै भएको छैन भने क्रियाशील सदस्यता वितरण तथा नवीकरण हुन सकेको छैन ।

तैपनि देउवा र पौडेल दुबैले सार्वजनिक रुपमा फागुनमै महाधिवेशन हुन्छ भन्दै आएका छन् ।

पूर्वमहामन्त्री सिटौलाले भने अब फागुनमा महाधिवेशन सम्भव नभएको तर्क गर्दै आएका छन् । देउवा र पौडेलसँग भएको भेटमा पनि आफूले त्यही धारणा राखेको भन्दै उनले भने, ‘कुनै जिल्लामा सभापति निकट साथी होला, कुनै जिल्लामा रामचन्द्र त कुनै जिल्लामा म निकट साथी सभापति हुनुहोला । तर कुनै पनि जिल्लाले क्रियाशील सदस्यता वितरण र नवीकरणको विवरण त पठाएनन् नि । यसको अर्थ तल समस्या छ भनेर हामीले बुझ्नुपर्छ ।’

कोरोना भाइरसको संक्रमणका साथै बाढी पहिरो जस्ता प्राकृतिक विपत्तिका कारण साउन–भदौमा काम नभएको र कात्तिकमा दशैंतिहार, छठ जस्ता चाडपर्व रहेको भन्दै नेता सिटौलाले नयाँ महाधिवेशन तालिका बनाउनुपर्ने बताएका छन् । उनले अनलाइनखबरसँग भने, ‘दुबै नेताले किन फागुनमा हुन्छ भन्नुयो ।’

गर्नुपर्ने महत्वपूर्ण कामहरु नै नभएको अवस्थामा यही फागुनमै महाधिवेशन हुन्छ भनेर दुबै नेताले कसरी भने आफूलाई आश्चर्य लागेको उनले बताए । अठौंदेखि पार्टीको महाधिवेशन प्रक्रियालाई नजिकबाट हेरेका सिटौलाका अनुसार महाधिवेशनमा सबैभन्दा जटिल विषय नै क्रियाशील सदस्यता बन्ने गरेको छ ।

अहिले त नयाँ क्रियाशील सदस्यता दिन वडामा पुराना क्रियाशीलहरुको बैठक नै बस्नुपर्ने व्यवस्था छ । वडाले सिफारिस गरेपछि प्रदेशको निर्वाचन क्षेत्रस्तरीय समितिले निर्णय गर्छ र संघीय निर्वाचन क्षेत्रीय समिति, जिल्ला हुँदै केन्द्रीय छानविन समितिसम्म विवाद आइपुग्छ । यो सबै चरण पार गर्न निश्चित समय लाग्छ ।

देउवा, पौडेल र सिटौलाबीच नरहरि आचार्यको नेतृत्वमा क्रियाशील सदस्यता छानविन समिति गठन गर्ने सैद्धान्तिक सहमति भएपनि बनेको छैन । संयोजक बनाउने भनिएका आचार्यले स्वास्थ्यका कारण समितिमा बस्न अस्वीकार गरेका छन् ।

अब पूर्व सहमतिअनुसार ६ जनाको नाम दिने र उनीहरुमध्ये एकलाई संयोजक तोकेर अगाडि बढ्ने नेता सिटौलाको प्रस्ताव छ । ‘क्रियाशील सदस्यता वितरण चार वर्षका लागि संगठन निर्माण पनि हो, प्रतिस्पर्धा आन्तरिक लोकतन्त्र पनि हो’ उनले अनलाइनखबरसँग भने, ‘आपसी समझदारीबाट प्रतिपस्र्धाको विधि र तालिका बनाउन सकेनौं भने महाधिवेशन निष्पक्ष हुन्न । र, नेतृत्वमा जो कोही आएपनि पार्टीमा एकता कायम गर्न सक्दैन ।’

तर देउवा र पौडेलले अहिले पनि समस्यालाई वस्तुगत रुपमा नलिएको भन्दै नेता सिटौलाले भनेका छन्, ‘गर्नुपर्ने काम चाहिँ नगर्ने, नहुुने कुरा फागुनमै महाधिवेशन हुन्छ भन्नेमा चाहिँ उहाँहरुको मत कसरी मिल्यो ? मैले बुझ्न सकेको छैन ।’


Your Views
Related News