बझाङ मष्टा गाउँपालिका-२ की १२ वर्षीया सम्झना कामीको बलात्कारपछि हत्यामा संलग्न व्यक्तिले एक महिनाअघि अर्की बालिकालाई बलात्कार गरेको खुलेको छ।

कामीको बलात्कारपछि हत्यामा पक्राउ परेका १८ वर्षीय राजेन्द्र बोहोरासँगको अनुसन्धानबाट प्रहरीले अर्को बलात्कार घटनाको तथ्य फेला पारेको हो।

सम्झनाको बलात्कारपछि हत्यामा संलग्न मष्टा-२ कै १८ वर्षीय युवा राजेन्द्र पक्राउ परेका थिए।  उनी अनुसन्धानका क्रममा जिल्ला प्रहरी कार्यालय बझाङको हिरासतमा छन्।

सम्झनाको बलात्कार र हत्याको अनुसन्धान भइरहँदा राजेन्द्रबाट अर्को बलात्कार भएको पत्ता लागेको प्रहरीले जनाएको छ।

घटना साउन २९ गते साँझ ५ बजेको हो। मष्टा-२ कै १४ वर्षीया दमाई थरकी बालिकालाई बोहोराले बलात्कार गरेको अनुसन्धानमा खुलेको छ।

अनुसन्धानअनुसार राजेन्द्रको परिवारले सो ठाउँमा घट्ट चलाउँछ।  प्रहरीका अनुसार त्यसदिन घट्टमा राजेन्द्र एक्लै थिए। बालिका पुग्दा उनले घट्टमा बलात्कार गरे।

घट्टमा गहुँ पिस्न गएका बखत राजेन्द्रले बालिकालाई लछारपछार पारेर बलात्कार गरेका थिए।  बलात्कारपछि दुवै पक्षबीच छलफल भएको र दुवैले कागज गरेर मिलापत्र गरेको कागज पनि भेटिएको छ। सो कागज सेतोपाटीलाई प्राप्त भएको छ।

यो घटना प्रहरीसम्म नलग्न दुवै परिवारले कागज गरेर ‘गुपचुप’ पारेको अनुसन्धानमा खुलेको छ। कागजमा साउन ३१ गते मिलापत्र गरेको देखिएको छ। दुवै पक्षका तीन–तीन जनाले कागजमा हस्ताक्षर गरेका छन्।

‘बालिका घट्टमा पिठो पिस्न गएका बखत सोही ठाउँमा बलात्कार घटना भएको थियो, त्यसको पेटमा बच्चा जन्म भएको भए त्यसको जिम्मेवारी लिउँला भनी यो कागजमा हस्ताक्षर गरेको छु,’ कागजमा भनिएको छ, ‘सो कुरा झुठो ठहरेमा कानुनी कारबाही बमोजिम सहने छु, त्यसभन्दापछि यो बालिकालाई देखाएर कुटपिट गरे भने सिधै नजिकको प्रहरी चौकीमा यो कागज पेश गर्नेछु।’

बलात्कारपछि कुटपिटसम्मको घटना भएको यो कागजले उजागर गर्छ। कुटपिट भएपछि दुवै पक्ष छलफलमा बसेको र सो छलफलबाट मिलापत्र गरेको देखिन्छ।

सो कागज गर्दा राजेन्द्रले बालिकाको खुट्टामा पाँच सय रुपैयाँ राखेर ढोगेको खुलेको पत्ता लागेको छ।

यसरी बलात्कारजस्तो जघन्य अपराधमा पीडित पक्ष र पीडकबीच ‘गर्भवती’ भए जिम्मा लिने सर्तमा कागजात भएपछि गाउँमा अर्को बलात्कारबाट सम्झनाको हत्या हुन पुगेको निष्कर्ष प्रहरीको छ।

‘यदि त्यसबेला नै यो घटना प्रहरीसम्म आइपुगेको भए अर्को घटना घट्न पाउने अवस्था हुन्नथ्यो, जसकारण सम्झनाको हत्या नै निम्तियो,’ सुदूरपश्चिम प्रदेश प्रहरी प्रवक्ता प्रहरी वरिष्ठ उपरीक्षक मुकेश सिंहले सेतोपाटीसँग भने, ‘तर, पीडित र पीडक पक्ष आपसमा मिलेर घटना गुपचुप गराएको पाइयो।’

पहिलो घटना सामसुम भएपछि राजेन्द्रको मनोबल बढेको अनुसन्धानमा देखिएको छ।  सम्झनाको बलात्कारपछि हत्या हुनुभन्दा एक साताअघिदेखि राजेन्द्रले पछ्याइरहेका थिए। उनले अर्को घटना दोहोर्‍याउने मनसाय नै राखेर सम्झनालाई पछ्याएको देखिन्छ।

एक महिनाअघि गाउँमै घटना भएको सुनेकी सम्झना त्यतिबेला झस्किसकेकी थिइन्। उनले घरमा यो कुरा भनेकी पनि थिइन्। जतिबेला उनले भनेकी थिइन्, उनको परिवारलाई थाहा थियो गाउँमा बलात्कार घटना भएको छ।

तर, आफन्तहरू निस्फिक्री बसे, सम्झनालाई एक्लै काममा लगाइरहे। जसका कारण राजेन्द्रले सम्झनालाई पछ्याइरहन सजिलो भयो।

‘पटक-पटक पछ्याएको, कानको मुन्द्री मागेको र यो घटनाले आफू डराएको सम्झनाले भन्ने गरेको त उनका हजुरबुवा गोरखबहादुरको जाहेरीमै उल्लेख छ,’ प्रहरी वरिष्ठ उपरीक्षक सिंहले भने, ‘थोरै संवेदनशील भइदिएको भए दोस्रो घटना हुँदैनथ्यो भन्ने आँकलन गर्न सकिन्छ।’

बुधबार साँझ सम्झनाको बलात्कारपछि हत्या भएको थियो।  त्यसदिन सम्झना घरबाट निस्केको पन्ध्र मिनेटमै बालिकालाई राजेन्द्रले बाटोमा फेला पारेको अनुसन्धानमा खुलेको छ।

सम्झना आधा घन्टा टाढा रहेको गोठमा गाईगोरु थन्क्याउन गइरहेकी थिइन्। उनलाई आधा बाटो पुग्दै राजेन्द्रले लछारपछार पारे। उनले बोकेको डोको नाम्लो त्यही नजिकै फालिदिए र जंगलको मन्दिरमा पुर्‍याए।

सम्झनालाई बलात्कार गरे। अघिल्लो घटनामा मिलापत्र गरेको बुझेका राजेन्द्रले बालिकाबाट अर्को घटनाको पोल खुल्ने ठाने।  उनले बालिकाको टाउकोमा ढुंगा प्रहार गरेको देखिएको छ। सम्झनाको कलेजो नै छेडिने गरी घोचेको पोस्टमार्टमको प्रारम्भिक रिपोर्ट रहेको एसएसपी सिंहले बताए।

सम्झनाको बलात्कारपछि हत्यामा अरू व्यक्तिको संलग्नता छ कि भनेर प्रहरीले अनुसन्धान गर्‍यो। सिंहका अनुसार राजेन्द्रसँग मिल्ने दुई जना युवा गाउँमा छन्।

तर, उनीहरू दुवै घटना भएको दिन गाउँमा नभएको पत्ता लागेको छ। ‘अपराह्न भएपछि युवाहरू गाउँको चौरमा खेल्ने गर्दा रहेछन्, राजेन्द्र पनि त्यहाँ जान्थे, तर त्यसदिन राजेन्द्र चौरमा नगएर सम्झनाको पछि लागेको देखिएको छ,’ सिंहले भने।

‘सो दिन सम्झनालाई नियन्त्रणमा लिएको एक घन्टाबीचमै हत्या भइसकेको तथ्यहरू हाम्रो अनुसन्धानमा आएका छन्,’ एसएसपी सिंहले भने।

राजेन्द्र ‘आवारा’ चरित्रका युवा हुन्। उनी कक्षा ८ मा पढ्छन्। पढाइमा खासै ध्यान नदिने उनी उछृङ्खल गतविधिमा बढी संलग्न हुने गरेको प्रहरीको भनाइ छ। उनीबाट गाउँमा केही चोरीका घटना पनि विगतमा भएका थिए।

उनको परिवार मध्यम हो।  राजेन्द्रबाट अर्की बालिका बलात्कार पुष्टि हुने तथ्यहरू लगभग जुटिसकेको सिंहले बताए।

‘जबरजस्ती करणीमै उनीविरूद्ध अर्को जाहेरी दर्ता गर्दैछौं, जाहेरी लिएर बालिका सदरमुकाम आइसकेकी छिन्,’ एसएसपी सिंहले भने।

मिलापत्र गराउने बोहरा र दमाई परिवारका छ जनालाई के कस्तो कारबाही आकर्षित गर्ने भन्नेबारे सरकारी वकिलसँग प्रहरी परामर्श गरिरहेको छ।

सिंहका अनुसार पहिले भएको बलात्कार घटना दुई गाउँमै मिलाइयो, त्यसको जानकारी गाउँपालिकाले लियो वा लिन चासो देखाएन त्यो पत्ता लाग्नै बाँकी छ।

तर, बलात्कारजस्तो गम्भीर अपराधमा मिलापत्रले मनोबल बढेका राजेन्द्र सम्झनाको बलात्कारपछि हत्यासम्म पुगेको प्रहरी अनुसन्धानले देखाउँछ।

READ MORE NEWS

त्यसदिन घर नफर्किएकी सम्झना कामी

बझाङको मष्टा गाउँपालिका-२ की १२ वर्षीया सम्झना कामी बुधबार साँझ साढे ५ बजे घरबाट गाई-गोरु गोठभित्र बाँध्न निस्केकी थिइन्।

घरदेखि आधी घन्टा टाढा गोठ छ। त्यसको बीचमा लाछीगाड खोला।

खोलापारिपट्टी जंगल छिचोलेर गोठमा पुग्नुपर्थ्यो।

बिहान गाई-गोरुलाई बाहिर पगा लगाइने र साँझ गोठभित्र बाँध्ने गरिन्थ्यो।

बिहान  गाई-गोरु बाहिर ल्याउने र साँझ भित्र बाँध्ने जिम्मा सम्झनाकै काँधमा थियो। उनी गोठमा गएको एक घन्टाभित्र घर आइपुग्थिन्।

बुधबार साँझ भने उनी दुई घन्टासम्म पनि फर्किनन्। नातिनी घर नफर्केपछि हजुरबुवा गोरख खोजीमा निस्के।  जताततै खोजी गर्दा पनि फेला पार्न सकेनन्।

त्यसपछि उनले गाउँलेलाई गुहारे।

गाउँलेहरू मिलेर सम्भावित ठाउँमा हेर्दा पनि सम्झना कतै भेटिइन्। त्यसपछि गोठ नपुग्दैको सिमदेवता मन्दिर गए। त्यहाँ सम्झनाको लास थियो।

निर्वस्त्र सम्झनाको शरीरभरि निलडाम र टाउकोमा चोट थियो। उनलाई पहिले बलात्कार गरी हत्या गरेको प्रारम्भिक अनुसन्धानमा खुलेको छ।

बझाङका प्रहरी नायब उपरीक्षक रुपक खड्काका अनुसार सम्झनाको शव पोस्टमार्टमका लागि जिल्ला अस्पताल लगिएको छ। विस्तृतमा रिपोर्ट आइसकेको छैन। प्रारम्भिक रिपोर्टमा बलात्कार खुलेको छ।

उनको हत्यामा संलग्न भएको आशंकामा प्रहरीले सोही ठाउँका १८ वर्षीय राजेन्द्र बोहरालाई पक्राउ गरेको छ। उनले प्रारम्भिक अनुसन्धानमा घटनामा संलग्नता इन्कार गरेका छन्।

सम्झनाको कानमा पाँच आनाका सुनका मुन्द्री थिए। शव भेटिँदा ती मुन्द्री कानमा थिएनन्।

प्रहरीका अनुसार गाई-गोरु थन्क्याउन जाने बाटोमा राजेन्द्रले सम्झनालाई कहिलेकाहीँ पछ्याउँदा रहेछन्।

राजेन्द्र र सम्झनाको घर दस मिनेट टाढा हो।

बेला-बेलामा राजेन्द्रले सम्झनासँग कानका मुन्द्री मागिरहेको कुरा सम्झनाले हजुरबुवा गोरखलाई भन्ने गरेकी थिइन्।

‘केही हुँदैन, गाउँकै मान्छे हो, हामी छौं नि किन डराउँछौ भनेर हजुरबुवाले ढाडस दिने गरेका रहेछन्,’ सुदूरपश्चिम प्रदेश प्रहरी प्रवक्ता प्रहरी वरिष्ठ उपरीक्षक मुकेश सिंहले भने।

एक साताअघि सम्झनाले हजुरबुवासँग राजेन्द्रले पछ्याउने गरेको भन्दै त्यो घटनाले आफू भयभीत भइरहेको संकेत दिएकी थिइन्। तर, परिवारले सामान्य ठान्दा अप्रिय घटना हुन पुग्यो।

शंकाको एकै व्यक्ति उनै राजेन्द्र छन्। खड्काका अनुसार त्यसदिन राजेन्द्र सम्झनालाई पछ्याउँदै गएको हुनसक्ने शंका गरिएको छ। र, उनले जंगल पुगेपछि सम्झनालाई मन्दिर पुर्‍याएर बलात्कारपछि हत्या गरी मुन्द्री लगेको आशंका छ।

तर, राजेन्द्रलाई पक्रँदा मुन्द्री फेला परेनन्। घटनामा राजेन्द्रबाहेक अन्य व्यक्ति थिएनन् भन्ने प्रहरीको बुझाइ छ।

सम्झना घरकी जेठी छोरी थिइन्। हजुरबुवा गोरख, हजुरआमा हाँसुदेवी कामीसाथ उनी बस्थिन्।

उनका बाबुआमा  घरमा छैनन्। हजुरबुवा हजुरआमासाथ बसिरहेकी उनी कक्षा ६ मा पढ्थिन्।

उनका माइली, साइली बहिनी र फूपू लक्ष्मी कामी घरमा छन्। बुवा बिजुली र आमा धउली कामी रोजगारीका लागि भारत कर्नाटकमा छन्। उनीहरूसाथ एक छोरा र दुई छोरी उतै छन्।

विपन्न परिवार भएकाले बुवाआमा नै रोजगारीमा गएको सम्झनाका कान्छा काका ईश्वरले बताए।

‘घरपरिवार पाल्नका लागि दाजू-भाउजू भारत छन्, मैले घटना सुनाएपछि फर्किंदैछन्,’ ईश्वरले भने, ‘ राजेन्द्रले कहिलेकाहीँ पछ्याउँदा रहेछन्, मुन्द्री माग्दा रहेछन्। त्यसदिन त बलात्कार गरी हत्या नै गरेछन्।’

उनीहरूको जग्गा-जमिन खासै छैन। पेशा केही पनि छैन।

सम्झना हँसिलो चेहराकी थिइन्। बोलाइली थिइन्। सबैसँग मिलनसार थिइन्। अह्राएको काम खुरुखुरी गर्थिन्। काममा सघाउने भएकाले हजुरबुवा-हजुरआमा उनैलाई बिहान गाई-गोरु पगा लगाउन र साँझमा गोठमा लगेर बाँध्न पठाउँथे।

बिहान गएर खोलेफाडो गर्थिन्, पानी खुवाउँथिन् र घाँस भएतिर पगा लगाउँथिन्। साँझ फेरि पानी र खोलेफाडो गरी फर्किन्थिन्।

सम्झना बलात्कृत भएपछि हजुरबुवा गोरखको होस-हवास उडेको छ।

शव भेटिएको बेला उनी बेहोस भए। शव कसले उठायो, कता लग्यो केही थाहा पाएनन्।

शुक्रबार बल्ल सम्हालिएर उनी जाहेरी लेखाउन वकिलकहाँ पुगेका छन्।

‘हामी आफन्तसहित जाहेरी लेखाउन वकिलकोमा आएका छौं, आज जाहेरी दिन्छौं,’ काका ईश्वरले भने।


Your Views
Related News