सिरहा नजिकैको भारतीय सीमामा पर्ने भीमनगरमा रहेको एक मन्दिरमा पूजाका लागि २ जना युवती चाहियो भन्दै खबर आयो । पूजामा चाहिने युवती ल्याएको खण्डमा मोटै रकम आउने युवती खोज्ने व्यक्तिले बताए ।

सप्तरीको अग्निसाइर कृष्ण सवरन गाउँपालिका–४ बनौलीका २९ वर्षीय मोहम्मद साहिल मनसुरी र सिरहाको लाहान नगरपालिका– १९ कटाहाका २९ वर्षीय जीवछकुमार साह युवती खोज्नतिर लागे ।

५ फिट ६ इञ्च भएको, शरीरमा कुनै दाग नभएको लगायतका शर्त युवती मगाउने व्यक्तिले राखेको थियो । मन्सुरी र साह उनीहरू गोप्य रूपमा त्यस्ता युवतीहरू खोज्न लागे ।

कहिले माया गर्ने बहानामा युवतीको नाप लिन्थे त कहिले उनीहरूलाई पैसा दिने लोभ देखाएर । तर पनि उनीहरूले भने बमोजिमका युवती पाउन सकेका थिएनन् । युवती खोज्नका लागि उनीहरू विभिन्न ठाउँमा भौँतारिए, तर अधिकांश मापदण्डभित्र परेनन्, परेकाहरू उनीहरूलाई विश्वास गर्न तयार भएनन् ।

त्यसपछि निराश भएका उनीहरू आफ्नै घरपरिवार वा नजिकको आफन्तबाट विकल्प खोज्ने निष्कर्षमा पुगे ।

मन्सुरी र साह दुवै विवाहित थिए । उनीहरूको निशानामा परे आ–आफ्नै सालीहरू ।

सालीलाई फकाउन सजिलो हुने उनीहरूको निष्कर्ष थियो ।

उनीहरूले पूजामा बस्ने मात्रै हो, त्यसबाट केही पैसा आउँछ, हामी मिलेर लिउँला भनेर फकाउन थाले ।

उनीहरूले आ–आफ्ना सालीहरूको उचाइ नापे । शरीरमा खत वा कुनै चोटपटक भए/नभएको पनि हेरे ।

सबै मापदण्ड सालीमा पुग्ने देखेपछि उनीहरूको फोटो र अन्य विवरण भारत पठाइसकेको देखिएको प्रहरीले जनाएको छ । (प्रहरी अनुसन्धानमा खुलेको घटना विवरण)

***
आएको पैसा बाँडौंला भनेर फकाएको बयान उनीहरूले प्रहरीसमक्ष दिएको जिल्ला प्रहरी कार्यालय सुनसरीका प्रवक्ता प्रहरी नायब उपरीक्षक (डीएसपी) नरेन्द्रकुमार कार्कीले बताए ।

‘उनीहरूले आफ्नै सालीलाई पूजामा बसेबापत आएको पैसा बाँडौंला भनेर फकाएको देखिन्छ,’ डीएसपी कार्कीले लोकान्तरसँग भने ।

आफ्नै भिनाजुले भनेपछि नमान्ने कुरै भएन, उनीहरू तयार पनि भए । त्यसपछि भारततर्फ लैजानका लागि घरबाट प्रस्थान गरे ।

मन्सुरी र साहलाई २ युवती भारततर्फ लैजाँदै गरेको अवस्थामा प्रहरीले बुधवार सुनसरीबाट पक्राउ गर्‍यो ।

सुनसरीको कोशी गाउँपालिका– ८ भण्टाबारीस्थित नेपाल–भारत सीमा नाका हुँदै भारतर्फ जाने क्रममा शंका लागेर सोधपुछ गर्ने क्रममा प्रहरीले २२ र १९ वर्षीया दुई युवतीलाई उद्धार गरेको छ ।

पक्राउ गरिएका साह र मन्सुरी तथा उद्धार गरिएका २ युवतीहरूसँग पछि सोधपुछ गर्दा पूजामा बस्ने भनेर भारत लैजान लागिएको खुलेको छ ।

‘प्रारम्भिक अनुसन्धानमा युवतीलाई फकाएर भारत लैजान लागेको खुलेको छ,’ डीएसपी कार्कीले भने ।

अनुसन्धानमा खटिएका एक प्रहरी अधिकृतले नेपालबाट भारतमा पूजाका लागि भनेर लगिए पनि बलि दिनका लागि लैजान लागेको हुनसक्ने देखिएको बताए ।

‘नेपालबाट पूजाका लागि भनेर फकाउने र उता लगेर मानव बलि दिने योजना रहेको देखिन्छ,’ ती प्रहरी अधिकृतले लोकान्तरसँग भने ।

अनुसन्धान पूरा भइनसकेकाले बलि दिन लागिएको भनेर प्रहरीले औपचारिक रूपमा भने भनिसकेको छैन ।

निश्चित उचाइ, जन्म मिति, उमेर, शरीरमा दाग नभएको, अविवाहित आदि खोज्नुले पनि बलि दिन लागिएको भन्ने शंकामा बल पुग्छ, ती अधिकृतले भने ।

यता जिप्रका सुनसरीका डीएसपी नरेन्द्रकुमार कार्कीले भने बलिका लागि हो कि होइन भन्ने यकिन हुन बाँकी रहेको बताए ।

‘उनीहरूलाई बलिकै लागि लैजान लागिएको हो भन्ने कुराको पुष्टि भइसकेको छैन । ती युवतीको बयानलाई आधार मान्ने हो भने पूजाका लागि भनेर फकाएको देखिन्छ,’ जिप्रका सुनसरीका प्रवक्ता समेत रहेका डीएसपी कार्कीले भने ।

प्रहरीका अनुसार उनीहरूलाई पूजाको समयमा ध्यानमा बस्नुपर्ने बताइएको थियो । त्यसबापत २ लाख रुपैयाँ आउने प्रलोभन देखाइएको प्रहरीको प्रारम्भिक अनुसन्धानमा खुलेको छ ।

प्रहरीले यस प्रकरणमा संलग्न अन्य अभियुक्तहरू पनि खोजी गरिरहेको छ ।

READ MORE NEWS

पिसिआर परीक्षणमा बढी शुल्क लिने यी ८ अस्पताल र ल्याबको अनुमति खारेज गर्ने चेतावनी

काठमाडौं- स्वास्थ्य तथा जनसंख्या मन्त्रालयले तोकेको भन्दा बढी पिसिआर परीक्षणको शुल्क लिने ८ अस्पताल र ल्याबलाई परीक्षण अनुमति खारेज गर्ने चेतावनी दिएको छ।

गुणस्तर मापन तथा नियमन महाशाखाले बढी शुल्क लिने ल्यावबारे मन्त्रालयमा बुझाएको प्रतिवेदन अनुसार यस्तो निर्णय गरेको हो।

स्वास्थ्य तथा जनसंख्या मन्त्रालयका प्रवक्ता प्राडा जागेश्वर गौतमका अनुसार ह्याम्स अस्पताल, मेटिसिटि अस्पताल, स्टार अस्पताल, बिएण्डबी अस्पताल, सूर्या ल्याव, डिकोर ल्याव, सिडिएल ल्याव र इन्टीपेर ल्यावलगायतले बढी शुल्क लिएकोले  २४ घण्टाभित्र  तोकिएको शुल्क समायोजन नगरे परीक्षण स्वीकृति खारेज गर्ने निर्णय भएको बताए।

उनले भने,‘एक पटकलाई चेतावनी दिने र २४ घण्टाभित्र तोकिएको शुल्क समायोजन नगरे परीक्षण स्वीकृति खारेज गरी पत्राचार गर्न गराउन राष्ट्रिय जनस्वास्थ्य प्रयोगशालालाई निर्देशन दिइएको छ।’

उनले  सरकारले भदौ २८ गते सबै सरकारी र निजी प्रयोगशालालाई पिसिआर शुल्क २ हजार तोकिएकोले त्यो भन्दा बढी शुल्क लिने गरेका प्रयोगशालालाई कालोबजारी गरेको आरोपमा  प्रयोगशाला बन्द गराउने गरी कारवाही गर्न गृह मन्त्रालय र वािणज्य विभागमा लेखि पठाउने निर्णय गरेको प्रवक्ता गौतमले जानकारी दिए।

उनले नेशनल टेष्टिङ गाइडलाइनमा नपरेका  र स्वास्थ्य मन्त्रालयले नतोकेको व्यक्तिको परीक्षण गर्ने, सुचीकृत नभएका प्रयोगशाला वा बिचौलियाको रुपमा नमुना लिने वा सहजीकरण गरेको पाइएमा कडा कारवाही गर्न लेखि पठाउने निर्णय भएको बताए।


Your Views
Related News