भक्तपुर, १९ असोज । भक्तपुरको मध्यपुर थिमी नगरपालिका वडा नं. ६ स्थित पाचो टोल बस्ने १०१ वर्षकी वृद्धाले सहजै कोरोना भाइरस जितेकी छन् । संक्रमण भएको १६ दिनमा नै उनी निको भएकी हुन् ।

गत असोज २ गते कोरोना संक्रमण पुष्टि भएकी गणेशमाया प्रजापतिले १६ दिनमा नै कोरोना जितेकी हुन् । त्याे पनि घरमै ताताेपानीकाे भरमा । गत शुक्रबार साँझ उनको कोरोना परीक्षणको नतिजा नेगेटिभ आएको उनका छोरा ईन्द्रबहादुर प्रजापतिले बताए ।

कोरोना संक्रमण पुष्टि भएपछि गणेशमाया होम आइसोलेसनमा नै बसिन् । उनले संक्रमणका बेला नियमितरुपमा दिनमा दुई चक्की भिटामिन सी बाहेक अन्य औषधी सेवन नगरेको छोरा ईन्द्रबहादुरले बताए । उनका अनुसार गणेशमायाले नियमितरुपमा पौष्टिक खाना र तातो पानी सेवन गर्ने, तातोपानीको बाफ लिने र घरेलु औषधीको रुपमा ल्वाङ, सुकुमेल, अलैंची, बेसार, अदुवा, पिपला, जाइपत्री लगायतको गरम मसलाको तातो पानी नियमित सेवन गरेर सहजै भाइरसमुक्त भएकी हुन् ।

वडाअध्यक्ष समेत रहेका ईन्द्रबहादुर प्रजापतिको कोरोना परीक्षण पोजिटिभ आएपछि परिवारको परीक्षण गर्ने क्रममा आमा गणेशमायामा पनि कोरोना संक्रमण देखिएको थियो । प्रजापतिका अनुसार उहाँकी दिदी र छोरामा पनि संक्रमण देखिएको थियो । प्रजापति मध्यपुर थिमि नगरपालिका वडा नं. ६ का वडाअध्यक्ष हुन् ।

१०१ वर्षीय गणेशमाया प्रजापतिमा कुनै पनि प्रकारको दीर्घरोग नभएको छोरा ईन्द्रबहादुरले जानकारी दिए । ‘उहाँमा कुनै रोग नभए पनि शारिरीक रुपमा केही कमजोर भने हुनुहुन्छ,’ छाेरा ईन्द्रबहादुरले भने, ‘तर उहाँ नियमित भिटामिन ई सेवन गर्नुहुन्छ । एक दिन भिटामिन ई सेवन गरिएन भने कमजोरीले थकान महसुस गर्ने गर्छ ।’

कोरोना संक्रमणका बेला गणेशमायामा कुनै विशेष खालको लक्षण नदेखिएको सामान्य रुघाखोकी तथा छाती दुख्ने लक्षण मात्र देखिएको थियो । परिवारमा वृद्ध आमालाइ मात्र नभई संक्रमित आफू र आफ्ना दिदी तथा छोरामा समेत कुनै विशेषखालको लक्षण नदेखिएको र सबैले नियमितरुपमा वाफ लिने, तातोपानी पिउने र पाैष्टिक खाना सेवन गर्ने गरेरै कोरोना जितेको ईन्द्रबहादुरले बताए ।

READ MORE NEWS

९ महिनासम्म चौकीका इन्चार्जहरुले इन्सपेक्टर भन्ठानेर सलाम मात्र गरिरहे !

काठमाडौँ । अजयकुमार राय पक्राउ पर्नु अघिसम्म प्रहरी सहायक निरीक्षक (असई) र राष्ट्रिय अनुसन्धान विभागको सहायक सूचक र खरिदारको लिखित परीक्षा चलाउँदै थिए । रायले गत बुधबार पर्साको वीरगञ्ज महानगरपालिका–१६ स्थित देव पार्टी प्यालेसको हलमा राखेर २१ परीक्षार्थीलाई परीक्षा लिइरहेको सूचना प्रहरीमा पुग्यो । जिल्ला प्रहरी कार्यालय पर्साको टोली त्यहाँ पुग्यो ।

प्रहरी निरीक्षक (इन्सपेक्टर) को पोसाकमा परीक्षा चलाएको देखेपछि प्रहरी आफै चकित पर्यो । तत्कालै घटनाबारे जिल्ला प्रहरी कार्यालय पर्साकी प्रहरी उपरीक्षक (एसपी) गंगा पन्तलाई जानकारी गर्यो । यस्तो परीक्षा प्रहरीले बाहिर लिने चलन छैन । शंका लागेपछि लोकसेवाको परीक्षा तयारीबारे राम्रोसँग बुझेकी एसपी पन्तले पन्तले रायलाई समात्न निर्देशन दिइन् ।

रायलाई समातेर जिल्ला प्रहरी कार्यालय पर्सा लगेपछि प्रहरी चौकीका इञ्चार्जहरू ९ महिनादेखि उनीसँग झुक्किरहेको अनुसन्धानबाट खुलेको एसपी पन्तले रातोपाटीलाई जानकारी दिइन् ।
‘सोधपुछको क्रममा राय प्रहरी चौकी परवानीपुर गइरहन्थे । चौकीमा जाँदा सादा पोशाक लगाउँथे,’ एसपी पन्तले भनिन्, ‘वीरगन्जमा घर बताउँदै रायले आफ्नो दरबन्दी जिल्ला प्रहरी कार्यालय सुर्खेतमा रहेको बताउँथे ।’

प्रहरी चौकीका इञ्चार्जले उनको कुरा पत्याइदिन्थे । एसपी पन्तका अनुसार चौकीमा इन्चार्जहरुले इन्सपेक्टर भन्ठानेर सलाम मात्र गरिरहे, आधिकारिकता परीक्षण गरेनन् । अनुसन्धानको क्रममा राय प्रहरी चौकी परवानीपुर, इनर्वा, छपकैया, नगवालगायत पुग्थे । प्रहरीसँग नजिक हुनकै लागि रायले त्यहाँ मिजासिलो व्यवहार गर्थे । रायलाई अहिले ठगी मुद्दामा अनुसन्धान थालिएको छ।

९ सय रुपैयाँ दिएर गार्ड

परीक्षामा रायले गार्डसमेत राखेका थिए । राम्रै पढेलेखेको शिक्षकलाई गार्ड राखेर बुधबार रायले परीक्षा सञ्चालन गर्दै थिए । ती गार्डलाई सरकारी स्केलमै ९०० रुपैयाँ दिइने भनेर झिकाएको खुलेको छ ।

बुधबारको परीक्षामा रायले बारा, पर्सा र सर्लाहीका २१ जना परीक्षार्थीलाई सहभागी गराएको एक शिक्षकले बताए । ती शिक्षकका अनुसार प्रश्नपत्रको ढाँचा भने पत्यारलाग्दो थिएन । प्रश्नपत्र प्रहरी प्रधान कार्यालयबाट जारी गरिएको थियो । गार्ड बस्ने शिक्षक पनि रायले चिनेकै व्यक्ति छन् ।

सशस्त्र प्रहरीको इन्सपेक्टरको आवरणमा ११० दिन जेलमा

राय २०७२ सालमा सशस्त्र प्रहरी निरीक्षक (इन्स्पेक्टर) को आवरणमा ठगी गरेको आरोपमा पक्राउ परेका व्यक्ति हुन् । जतिबेला ११० दिन प्रहरी हिरासतमा बसेर मुक्त भएका थिए ।
एसपी पन्तका अनुसार रायले २०७२ सालमा सशस्त्र प्रहरीको इन्सपेक्टर भएर बारा जिल्लामा यस्तै किसिमको ठगी गरेको पाइएको छ । रायले सशस्त्र प्रहरीलाई पनि झुक्याएर लाभ लिएको पन्तले जानकारी दिइन् ।

त्यतिबेला पनि रायले सशस्त्र प्रहरीको परिचय–पत्र, नम्बर प्लेटलगायत बनाएका थिए । पछिल्लो पटक पनि नेपाल प्रहरीको इन्सपेक्टरको पोसाकसहित पक्राउ परेका रायले परिचय–पत्र र नम्बर प्लेट बनाएका छन् ।

सोधपुछको क्रममा रायले काठमाडौँबाट बनाएर ल्याएको बताएका छन् । रायले लगाएको इन्सपेक्टरको बर्दी सक्कली रहेको खुलेको छ । रायले लगाएको पोशाक नेपाल प्रहरीले लगाउने सक्कली बर्दी हो ।

बर्दीसहित पक्राउ परेका रायले प्रहरीको बर्दी कहाँबाट ल्याए ? प्रहरी संगठनमा चासोको विषय बनेको छ । कामको सिलसिलामा पोशाक च्यातिएको खण्डमा प्रहरी कर्मचारीले जुनसुकै बेलामा पनि पोशाक सिलाउन सक्ने नेपाल प्रहरीका प्रवक्ता प्रहरी वरिष्ठ उपरीक्षक (एसएसपी) कुवेर कडायतले बताए ।

तर, नेपाल प्रहरीको कर्मचारीले लगाउने पोसाक जो कोहीले सिलाउन नसक्ने कडायतको दावी छ । ‘हाम्रो मापदण्ड अनुसारको पोसाक कसैले पनि सिलाउन सक्दैन,’ प्रवक्ता कडायतले भने । नेपाल प्रहरीको आफ्नै टेलर समेत रहेको कडायतले बताए । ‘नयाँ पोशाक सिलाउन परे आफ्नै टेलरमा गएर सिलाउन सकिन्छ,’ एसएसपी कडायत बताउँछन् ।

रायले लगाएको पोशाकमा प्रहरीको नेम प्लेट पनि राखिएको छ । एसपी पन्तका अनुसार यस्तै समुदाय प्रहरी साझेदारीको लोगो पनि लगाएको देखिन्छ । रायले नेम प्लेट कहाँ बनाउन दिएको र समुदाय प्रहरी साझेदारीको लोगो कहाँबाट लिएको खुलेको छैन ।

लकडाउनका कारण ठगी पेशामा

कोरोनाभाइरस (कोभिड–१९) को महामारीको कारण ०७६ चैत ११ देखि लकडाउन भयो । लकडाउनको बीचमा राय बारा र पर्सामै बस्थे । रायको बारा जितपुर सिमरा उपमहानगरपालिका–७ चौधरी टोल घर हो । लकडाउनका कारण आर्थिक गतिविधि ठप्प भएपछि राय आफैले थालेको पुरानो काममा फर्केको प्रहरीको प्रारम्भिक अनुसन्धानबाट खुलेको छ ।

रायले बारा र पर्साका १३ जनालाई ठगेको पाइएको एसपी पन्त बताउँछिन् । रायले उनीहरुसँग तीन लाख ६१ हजार रुपैयाँ ठगेका छन् । परीक्षा चलाएबापत रायले २ लाख रुपैयाँसम्म उठाउने रायले योजनासमेत बनाएको पाइएको छ ।


Your Views
Related News