काठमाण्डौ – सरकार र डाक्टर गोविन्द केसी पक्षबीच आज वार्ता हुने भएको छ ।

हिजो दुवैपक्षले वार्ता टोली गठन गरेलगत्तै आज छलफलमा बस्ने तयारी भएको हो । तर समय भने तय भइसकेको छैन। सरकारी टोलीका संयोजक शिक्षा सचिव गोपीनाथ मैनालीले आफू दिउँसो २ देखि ४ बजेसम्म हुने सार्क मन्त्रीस्तरीय बैठकमा सहभागी हुनुपर्ने भएकाले त्यसपछि बैठक बस्ने योजनामा रहेको बताउनुभयो ।

डाक्टर केसी पक्षका संयोजक डाक्टर जीवन क्षेत्रीले जतिसक्दो छिटो छलफलमा बस्न सरकारलाई आग्रह गरिएको बताउनुभयो । डाक्टर केसीसँग वार्ताको लागि सरकारले शिक्षा सचिव मैनालीको संयोजकत्वमा स्वास्थ्य मन्त्रालयका सहसचिव डाक्टर गुणराज लोहनी र चिकित्सा शिक्षा आयोगका निर्देशक डाक्टर दिलीप शर्मा सदस्य रहेको टोली गठन गरेको हो ।

यस्तै डाक्टर केसीका तर्फबाट डाक्टर जीवन क्षेत्रीको संयोजकत्वमा नेपाल स्वास्थ्य अनुसन्धान परिषद्का अध्यक्ष डाक्टर अञ्जनीकुमार झा, नेपाल चिकित्सक संघका अध्यक्ष डाक्टर लोचन कार्की र अधिवक्ता ओमप्रकाश अर्याल सदस्य रहेको टोली गठन भएको छ ।

डाक्टर केसी अनसनमा बसेको आज २५ दिन पुगिसकेको छ । उहाँको स्वास्थ्यमा निकै समस्या आउन थालेकाले तत्काल आईसीयूमा सार्नुपर्ने उपचारमा संलग्न डाक्टरले बताएका छन् । तर डाक्टर केसीले आईसीयूमा जान अस्वीकार गर्नुभएको छ । चिकित्सा शिक्षा सुधारका विषयमा विभिन्न ६ बुँदे माग राख्दै डाक्टर केसी १९ औं पटक अनसन बस्नुभएको हो ।

उहाँले सरकारसँग ०७५ साउन १० गते गरिएको सम्झौताअनुसार चिकित्सा शिक्षा ऐन संशोधन गर्नुपर्ने, त्रिवि चिकित्साशास्त्र अध्ययन संस्थान आईओएममा वरिष्ठता मिचेर गरिएका नियुक्ति सच्याउनुपर्ने र बयलपाटा अस्पताललाई नियमित र आवश्यक बजेट व्यवस्था गरी निःशुल्क स्वास्थ्य सेवा सुनिश्चित गर्नुपर्ने लगायत ६ बुँदे माग राख्नुभएको छ ।

उहाँको माग शिक्षा, स्वास्थ्य मन्त्रालय, आयोग र त्रिभुवन विश्वविद्यालयसँग सम्बन्धित छन् । गएको भदौ २९ गते डाक्टर केसीले जुम्लाको धर्मशालामा अनसन सुरु गर्नुभएको थियो । उहाँलाई पछि काठमाण्डौ ल्याइएको हो ।

READ MORE NEWS

माेबाइल र ल्यापटप किन्न एक वर्षमै ५६ लाखभन्दा धेरै खर्च गर्ने सप्तरीको छिन्नमस्ता गाउँपालिका

सप्तरी – देशमा स्थानीय सरकार आएपछि पालिकाहरुमा व्यापक मात्रामा आर्थिक अनियमितता भएको पाइएको छ । यसै क्रममा सप्तरीको छिन्नमस्ता गाउँपालिकामा आर्थिक वर्ष २०७६/०७७ मा मोबाइल र ल्यापटप खरिदमा मात्र पचास लाखभन्दा बढी खर्च गरिएको पाइएको छ ।

सात महिनादेखि विश्वमा कोरोना महामारीका कारण लकडाउन हुँदा नागरिकहरु भोकभोकै बस्नुपर्ने अवस्थामा सप्तरीकाे छिन्नमस्ता गाउँपालिकाले मोबाइल सेट र ल्यापटप खरिदमै गाउँपालिकाका झण्डै आधा करोड बजेट खर्च गरिएको पाइएको हो ।

गाउँपालिकाको जिन्सी शाखाको तथ्याङ्कअनुसार आर्थिक वर्ष २०७६/०७७ मा गाउँपालिकाले सात थान मोबाइल सेट खरिदमा दुई लाख ८८ हजार १० रुपैयाँ र भिभाे कम्पनीको तीन थान मोबाइल सेट खरिदमा १ लाख ८९ हजार ६ सय रुपैयाँ खर्च भएको जनाएको छ । यस्तै सामसुङ कम्पनीको दुई थान मोबाइल सेट खरिदमा ३२ हजार, नोकिया कम्पनीको ६ थान मोबाइल सेट खरिदमा २४ हजार तीन सय र रेडमी मोबाइल सेट तीन थान खरिदमा एक लाख ३५ हजार रुपैयाँ खर्च भएको जनाएको छ ।

यसैगरी गाउँपालिकाले खरिद गरेका मोबाइल सेटहरु अधिकांश जनप्रतिनिधि तथा कर्मचारीहरुले चलाइरहेको स्राेतले जनाएको छ । तर कतिपय जनप्रतिनिधिहरुले मोबाइल सेट नपाएको गुनासो गरेका छन् । मोबाइल सेट खरिदको नाममा बजेट भने खर्च भइसकेको जिन्सी शाखाको तथ्याङ्कमा उल्लेख छ ।

त्यसैगरी ३५ थान ल्यापटप खरिदमा २६ लाख ७५ हजार तीन सय ४४ रुपैयाँ ९५ पैसा ,एसुस कम्पनीको ल्यापटप १६ थान खरिदमा १४ लाख १५ हजार दुई सय ६२ रुपैयाँ १० पैसा र ३७ थान प्रिन्टर र बिलिङ प्रिन्टर खरिदमा ८ लाख सात हजार ९५ रुपैयाँ ७५ पैसा खर्च भएको जनाएको छ । छिन्नमस्ता गाउँपालिकाले मोबाइल सेट र ल्यापटप खरिदमै कुल ५६ लाख ४६ हजार ६ सय ११ रुपैयाँ खर्च गरिएको गाउँपालिका स्राेतले जनाएको छ ।

तर केही जनप्रतिनिधिहरुले भने अहिलेसम्म गाउँपालिकाबाट कुनै पनि मोबाइल सेट अथवा ल्यापटप प्राप्त नगरेको बताउँछन् । छिन्नमस्ता गाउँपालिका वडा नं ६ का वडाध्यक्ष वीरेन्द्र साह मण्डल र वडा नं २ का वडाध्यक्ष चुनचुन साहले अहिलेसम्म आफूले गाउँपालिकाबाट कुनै पनि मोबाइल सेट अथवा ल्यापटप नलिएको प्रतिक्रिया दिनुभएको छ ।

यस्तै नेकपाका स्थानीय नेता जयप्रकाश यादवले जनप्रतिनिधिहरुले आफूखुसी आधा करोडभन्दा बढीको मोबाइल सेट र ल्यापटप खरिद गरेर आर्थिक अनियमितता गरेको आरोप लगाउनुभएको छ ।

यस सम्बन्धमा गाउँपालिकाका प्रमुख प्रशासकीय अधिकृत खेम थापाले आर्थिक वर्ष २०७६/०७७ मा गाउँपालिकाले मोबाइल सेट तथा ल्यापटप खरिद गरेको स्वीकार्दै त्यो कर्मचारी र जनप्रतिनिधिहरुले प्रयोग गर्दै आइरहेको बताउनुभएको छ ।

आज विश्व दृष्टि दिवस : विश्वमा १९ वर्षमुनिका तीन करोड १२ लाख बालबालिकामा दृष्टि समस्या

काठमाण्डौ – आज विश्व दृष्टि दिवस । ‘दृष्टिप्रतिको आश’ भन्ने नाराका साथ नेपालमा पनि विश्वदृष्टि दिवस मनाइँदै छ ।

विश्व स्वास्थ्य सङ्गठनको तथ्याङ्क अनुसार विश्वमा झण्डै दुई अर्ब २० करोड मानिसमा दृष्टिसम्बन्धी समस्या छ । जसमध्ये तीन करोड १२ लाख १९ वर्षमुनिका बालबालिकामा दृष्टि समस्या देखिएको छ ।

आँखा सेवाको पहुँच भएमा झण्डै एक अर्ब मानिसको अझै पनि दृष्टिको जगेर्ना गर्न सकिने आँकलन छ । नेपालमा कुल जनसङ्ख्याको शून्य दशमलव ३५ प्रतिशतमा दृष्टिदोषको समस्या रहेको पछिल्लो तथ्याङ्क छ ।

यो समस्या सन् १९८१ को सर्वेक्षणमा शून्य दशमलव ८४ प्रतिशत जनसङ्ख्यामा रहेको पाइएको थियो । अन्धोपन तथा दृष्टिदोषको अनुपातमा कमी देखाए पनि जनसङ्ख्या वृद्धि र ज्येष्ठ नागरिकको सङ्ख्यामा भएको वृद्धिले अन्धोपन तथा दृष्टिदोषको समस्या बढ्दो छ  । अहिले कोभिड-१९ को जोखिमका कारण आँखाका बिरामी र समस्या अझ बढ्दै गएका छन् ।

कोरोना सङ्क्रमणबाट आफू, आफ्नो परिवार र समुदायलाई जोगाउन स्वास्थ्य सावधानी अपनाउन सरकारले आग्रह गरेको छ । दिवसका अवसरमा शुभकामना दिँदै स्वास्थ्य तथा जनसङ्ख्यामन्त्री भानुभक्त ढकालले नागरिकको दृष्टिको सुरक्षाका लागि सरकार सचेत रहेको बताउनुभएको छ ।

उहाँले सरकारले लागू गरेका जनस्वास्थ्य मापदण्डको अनिवार्य पालना गर्न पनि आग्रह गर्नुभएको छ ।


Your Views
Related News