काठमाडौं । पछिल्लो एकडेढ दशकयता नेपालमा आन्तरिक पर्यटनको संस्कृति बढ्दै गएको छ । काठमाडौं उपत्यकामा बसेर काम गर्नेहरु पनि उपत्यका धेरै साँघुरो हुँदै गएका कारण शुक्रबार–शनिबार नजिकैका डाडाँकाडाँमा जाने चलन पनि व्यापक रूपमा बढ्दै गएको छ ।

 

हाल महामारीको कारणले यो चलन केही अवरुद्ध हुन पुगेपनि आन्तरिक पर्यटकहरुलाई लक्षित गर्दै विभिन्न गन्तव्यहरू निर्माण भइरहेको छन्, काठमाडौं वरपर ।

 

स्वच्छ हावा र नयाँ वातावरणमा रमाउन चाहनेहरूका लागि काठमाडौंको रत्नपार्कबाट करिब २० किलोमिटर र गागलफेदीबाट ५ किलोमिटरको दूरीमा रहेको कागेश्वरी नगरपालीका १ नम्बर वडा स्थित लाेकतान्त्रिक शहिद पार्क चर्चित गन्तव्यको रूपमा उदाइरहेको छ ।

 

भाइरसको महामारीको कारणले लामो समयसम्म घरमा थुनिएका मानिसहरुको लागि दशैंमा स्वास्थ्य ‘प्रोटोकल’को पालना गर्दै घुम्नका लागि यो ठाउँ उपर्युक्त गन्तव्य हुनसक्छ ।

काठमाडौंको गागलफेदीदेखि शहिद पार्कसम्मको यो हाइकिङ रुट पछिल्लो समय चर्चित भइरहेको छ । गागलफेदीबाट दुई घन्टा हिँड्दा शहिद पार्कसम्म पुगिन्छ ।

 

अहिलेको अवस्थामा पनि सामान्य दिनमा दैनिक ८०–९० जना र बिदाको दिन २५० जनासम्म आन्तरिक पर्यटक यहाँ घुम्न आउने गरेको स्थानीय बताउँछन् । यही अवसरलाई ध्यानमा राख्दै यो रुटमा नयाँ नयाँ रेष्टुरेन्ट, होटल र विश्रामस्थलहरू खुल्न थालेका छन् । साथै, यो रुटमा ढलान गरिएको पक्की बाटो पनि बनिसहेको छ । यो रुट २०७१ सालदेखि निर्माण शुरू गरिएको थियो ।

 

 

‘अहिले हामीले ४ मिटरको बाटो ढलान गरेका छौं तर, यो बाटो १० मिटर सम्मकाे फराकिलो बनाउने योजना छ’, कागेश्वरी मनोहरा नगरपालीका वडा नं. १ का वडाअध्यक्ष मुकुन्द गजुरेलले चाणक्य पोष्टसँग भने ।

 

भविष्यको योजना सुनाउँदै वडाअध्यक्ष गजुरेल भन्छन् ‘एकै पटक ठूलो बजेट खर्च खर्न सक्ने अवस्था नभएकाले विस्तारै काम अगाडि बढीरहेको छ । भोलिको दिनमा यो बाटोलाई बढाएर चिसापानीसम्मको रुट तयार गर्ने काम भइरहेको छ ।’

 

वडाले यो क्षेत्रलाई धार्मिक र पर्यटकीय स्थलको रूपमा विकास गर्दै जाने योजना बनाएको सुनाउँदै उनले भने ‘सहिद स्थम्भ निर्माण गर्ने, अन्य मनोरञ्जन स्थल निर्माण गर्ने र कागेश्वरी मन्दिर क्षेत्रको पनि विकास गर्दै लाने तयारी गरेका छौं ।’

 

पर्यटकहरूका लागि शहिद पार्कको अलावा कागेश्वरी मन्दिर पनि प्रमुख गन्तव्यको रुपमा यो रुटमा रहेको छ । अब आउने काग तिहारको दिन ठूलो कागको प्रतिमा यो पार्ककाे प्राङगणमा स्थापना गर्न लागिएको वडाअध्यक्ष गजुरेलले जानकारी दिए ।

 

 

 

 

 

 

 

READ MORE NEWS

पर्यटकीय सम्भावना बोकेको गन्यापधुरा क्षेत्रको विकासका लागि पहल शुरु

सुदूरपश्चिम प्रदेशमा कान्छो खप्तड भनेर चिनिने प्रचुर पर्यटकीय सम्भावना बोकेको डडेल्धुरा जिल्लाको गन्यापधुरा गाँउपालिका–४ स्थित गन्यापधुरा क्षेत्रमा पहिलो पटक सुदूरपश्चिम प्रदेश सरकारले जैविक विविधता तथा जलाधार संरक्षण कार्यक्रम कार्यान्वयन गर्ने भएको छ । सुदूरपश्चिम प्रदेश सरकारको उद्योग, पर्यटन, वन तथा वातावरण मन्त्रालयले गन्यापधुरा क्षेत्रको जैविक विविधता र जलाधार संरक्षणका लागि चालु आर्थिक बर्षमा पहिलो पकट १५ लाख बजेट बिनियोजन गरेको हो ।

प्रदेश सरकारकी उद्योग, पर्यटन, वन तथा वातावरण मन्त्री माया भट्टले गन्यापधुरा प्रचुर पर्यटकीय सम्भावना बोकेको धार्मिक तथा मनमोहक पर्यटकीय क्षेत्र भएकाले चालु आर्थिक बर्षमा सो क्षेत्रको जैविक विविधताका साथै जलाधार संरक्षणकासाथै पर्यटन प्रवद्र्धनका लागि कार्यक्रम शुरुवात गरिएको जानकारी दिइन् । डडेल्धुरा सदरमुकामस्थित भू–तथा जलाधार व्यवस्थापन कार्यालय मार्फत सो कार्यक्रम कार्यान्वयन हुने प्रदेश सरकारको उद्योग, पर्यटन, वन तथा वातावरण मन्त्री भट्टको निजी सचिवालयले जनाएको छ ।

जलाधार संरक्षणको अभावमा सो क्षेत्रमा भूक्षय र बाढीपहिरोको समस्या रहेकाले चालु आर्थिक बर्षदेखि जलधार संरक्षणका साथै जैविक विविधता संरक्षणका लागि डिभिजन वन कार्यालय डडेल्धुरासँग सहकार्य गरेर प्रभावकारी रुपमा कार्यक्रम कार्यान्वयन गरिने भू–तथा जलाधार व्यवस्थापन कार्यालय डडेल्धुराका प्रमुख पुष्पराज जोशीले जानकारी दिए ।

सो क्षेत्रमा जैविक विविधता र जलाधार संरक्षणका साथै पर्यटन प्रर्वद्धनका लागि चालु आर्थिक बर्षदेखि काम थालनी गरिने भू–तथा जलाधार व्यवस्थापन कार्यालय डडेल्धुराले जनाएको छ । डिभिजन वन कार्यालय डडेल्धुराका डिभिजनल प्रमुख विष्णुप्रसाद आचार्यले गन्यापधुरा क्षेत्र प्रशिद्ध धार्मिक क्षेत्रका साथै प्रचुर सम्भावना भएको पर्यटकीय गन्तब्य रहेकाले सो क्षेत्रमा पर्यटन प्रवद्र्धनका लागि हाईकिङ, ट्रेकिङ, पर्यटकहरुका लागि आवास व्यवस्थापन लगायतका कार्यक्रमहरु अविलम्ब कार्यान्वयन गरिनु आवश्यक रहेको बताए ।

सुदूरपश्चिम प्रदेशकै प्रमुख पर्यटकीय गन्तब्य बन्नसक्ने सम्भावना बोकेको सो क्षेत्रमा बाटोमा साईनबोर्डहरु राख्ने, जीपीए लोकेसन बनाउने र प्रचार प्रसारमा चालु आर्थिक बर्षबाटै काम शुरु गरिने भू–तथा जलाधार व्यवस्थापन कार्यालय डडेल्धुराले जनाएको छ । गन्यापधुरा गाउँपालिकाले गत आर्थिक बर्षमा सो क्षेत्रमा पर्यटन प्रवद्र्धनका लागि स्थानीय स्तरबाट पहल गरेको र सो क्षेत्रलाई प्राथमिकतामा राखेर बर्षेनी सो क्षेत्रको समग्र विकासका लागि बजेट बिनियोजन गरिने गन्यापधुरा गाँउपालिकाका अध्यक्ष नबलबहादुर मल्लले जानकारी दिए ।

उनले गन्यापधुरा क्षेत्रका समग्र विकासका लागि पहल गरिने बताए ।समुद्री सतहदेखि दुई हजार छ सय ७६ मिटर उचाईमा रहेको गन्यापधुरा क्षेत्र महाभारत पर्वत श्रृंखलाको सबैभन्दा उचाईमा रहेको प्रशिद्ध धार्मिक क्षेत्र हो । प्राकृतिक सौन्दर्यले भरिपुर्ण सो क्षेत्र जैविक विविधताका हिसाबले पनि महत्वपुर्ण रहेको डिभिजनल वन अधिकृत आचार्यले बताए । उनले निकै उचाईमा रहेको सिमसार क्षेत्र र मनमोहक गन्याप तालको विकास गर्न सकिएमा जैविक विविधता संरक्षणमा टेवा पुग्ने बताए ।


Your Views
Related News