काठमाडौ । खाद्य वस्तु, श्रीङ्गारका सामान खरिद गर्ने जो कोही झस्किने तथ्य बाहिर आएको छ । जुन अधिकांश सामानको उत्पादन गरेको मितिले निश्चित मिति तोकेर बजारमा राख्नुपर्ने हुन्छ । किनकी त्यो मिति नाघेपछि त्यस्ता वस्तु अखाद्य वा उल्टो असर गर्ने पदार्थ बन्ने गर्दछ ।

 

 

तर नेपालमा दुई बर्ष अघिदेखि मिति सकिएका सामानहरुमा पुन मिति टाँसेर बिक्रिका लागि बजार पठाउने गरेको तथ्य खुल्दा सबै चकित बनेका छन् । पुरानो उपभोग्य मिति मेटेर नयाँ मिति राखिएको प्रकरणमा पक्राउ परेका भारतीय नागरिक रोनक बोथराले ‘रिलेबलिङ’ गर्ने कार्य दुई वर्षदेखि गरिरहेको बयान दिएका छन् । यसले प्रहरी र खाद्य प्रशासनका अधिकारीहरु नै चकित बनेका छन् ।

 

 

 

उनले बजारमा म्याद सकिएको वस्तु सस्तोमा किनेर ल्याई नयाँ मिति राखेर बजारमा बिक्री गर्ने गरेको बयान दिएको वाणिज्य, आपूर्ति तथा उपभोक्ता संरक्षण विभागले जनाएको छ । बिभागका अनुसार, बोथराले ‘डेढ–दुई वर्षदेखि यो काममा म मात्र संलग्न छु’ भनेका छन् । तर यो सबै उनले अरुलाई बचाउन गरेको प्रयास हुनसक्छ उनीहरुले भनेका छन् । उनले आफू आयान डिष्ट्रिब्यूटरको म्यानेजरको रुपमा नियुक्त भएको र कम्पनीले खरिद–बिक्री भएका सामानहरुको बजारबाट भुक्तानी लिने, सेल्स एकाउण्ट रेखदेखको जिम्मेवारी दिएको बयान दिएका छन् ।

 

 

 

 

 

आयान डिष्ट्रिब्यूटरकी सञ्चालिका पुष्पादेवी अग्रवालले कम्पनी आफ्नो नाममा भए पनि कारोबार नगरेको बताएको बिभागले जनाएको छ । बिभागका अनुसार, प्रहरीले पक्राउ गरेपछि मात्र कम्पनीमा त्यस्तो काम हुने गरेको थाहा पाएको अग्रवालको बयान छ ।

 

 

 

नयाँ म्याद राखेर सामान बजारमा पठाइँदै गरेको अवस्थामा रङ्गेहात पक्राउ परेका कामदार मुन्ना ठाकुरले भने आफू आयान डिष्ट्रिब्यूटरमा तीन वर्षदेखि काम गर्दै आएको र पहिलो पटक कलंकी गोदाममा पुगेकै दिन समातिएको बताएका छन् ।

 

 

 

अर्का कामदार विक्रम कुमार गुप्ताले आफूलाई कम्पनीमा रिलेबलिङ हुने कुरा थाहा नभएको बयान दिएको बिभागले जनाएको छ । त्यस्तै, कामदार पुष्पकुमार ठाकुरले नयाँ मिति राख्ने मेशिन चलाउन सिकाउने गरेको बताएका छन् ।

 

 

 

अर्का कामदार रामबहादुर बयलकोटीले म्याद सकिएको वस्तुमा नयाँ मिति राखेर बिक्री गर्न बजार लैजाने गरेको स्वीकार गरेका छन् । उनले थाहा पाएरै त्यस्तो बस्तु बिक्रीे गरेको बताएको बिभागको भनाइ छ ।

 

 

 

पुष्पादेवीलाई धरौटी, बोथरालाई थुनामा पठाउन आदेश

विभागका महानिर्देशक नेत्रप्रसाद सुवेदीको इजलाशले आयान डिष्ट्रिब्यूटरकी मुख्य सञ्चालिका पुष्पादेवी अग्रवाललाई मुलुकी फौजदारी कार्यविधि (संहिता) ऐन २०७४ बमोजिम धरौटीमा छोडेको छ भने अपराध स्वीकार गरेका बोथरालाई थुनामा पठाएको छ ।

 

 

 

आदेशमा भनिएको छ, ‘पुष्पादेवी अग्रवाललाई एक करोड रुपैयाँ जमानत वा बैंक ग्यारेन्टीमा छोड्नू र बोथरालाई थुनामा पठाउनू ।’ भाग्नसक्ने भएकाले मुद्दाको अन्तिम किनारा नलागेसम्म बोथरालाई थुनामा पठाउने आदेश भएको विभागले जनाएको छ ।

 

 

 

नयाँ मिति राखेर सामान बजार लैजान सघाउने कामदारहरुबाट जनही पाँच लाख धरौटी लिन र धरौटी बुझाउन नसके थुनामा पठाउन विभागले आदेश गरेको छ ।

 

 

 

विभागले आयान डिष्ट्रिब्यूटरको गोदाममा भेटिएका नयाँ मिति राखिएका वस्तुहरुको प्रारम्भिक सूची पनि सार्वजनिक गरेको छ । त्यसमा ५ हजार ७ सय कार्टुन ट्याङ्ग पाउडर जुस, ५९१ कार्टुन स्नीकर्स चकलेट, ७ सय वटा प्रिङ्गल्स चिप्स, ७९ कार्टुन ओरियो बिस्कुट, ५ कार्टुन हर्लिक्स र बर्नभिटा छन् । गोदामको रुपमा प्रयोग गरिएका तीन वटा घरबाट थुप्रै सामान बरामद भएकाले विस्तृत विवरण पछि आउने विभागले जनाएको छ ।


Your Views
Related News