बागलुङ — गत चैतमा ढोरपाटन सिकार आरक्षमा टेन्डर पारेर राजस्व बुझाएका सिकारी आएनन् । कोरोना संक्रमणले संसारभर लकडाउन भएकाले बोलकबोल भइसकेर पनि सिकारी आउन नपाएपछि सिकारको टेन्डर रद्द भयो ।हरेक वर्ष ढोरपाटनमा चैत र कात्तिकमा दुई पल्ट सिकारका लागि टेन्डर खुल्छ । चालु आर्थिक वर्षको पहिलो सिजनको टेन्डर अहिले खुलेको छ । तर सिकारी आउने सम्भावना भने नभएको सहायक संरक्षण अधिकृत रमेश यादव बताउँछन् । सरकारले अन्तर्राष्ट्रिय उडान खुला गरे पनि सिकारी आएर टेन्डर भर्ने सम्भावना नरहेको उनले बताए ।गत चैतका लागि ११ वटा नाउर र ३ वटा झारल सिकारको टेन्डर खुलेको थियो । उक्त सिजनमा सिकार नभएपछि त्यति नै संख्यामा पुनः टेन्डर खुल्यो । दुई सिजनमा गरी २६ नाउर र १० वटासम्म झारलको सिकार अनुमति दिने गरिन्थ्यो ।सिकारीले १५ देखि २१ दिनसम्म आरक्षमा बसेर सिकार गर्न पाउने व्यवस्था छ । उनीहरू ९ लाखदेखि १२ लाख रुपैयाँसम्मको बोलकबोल गरेर नाउर मार्न तयार हुन्थे । यसरी हरेक वर्ष ढोरपाटनमा २ करोड रुपैयाँभन्दा बढी राजस्व संकलन हुने गरेको थियो । कोरोना महामारीसँगैको लकडाउनले राजस्व संकलनमा पनि असर परेको छ । अघिल्लो वर्षको दोस्रो सिजनमा एउटै नाउरको १३ लाख ५१ हजार र झारलको १३ लाख ५० हजार रुपैयाँ राजस्व उठेको थियो ।
‘गत वर्षको रकम जस्तै राजस्व संकलन हुन्थ्यो, अहिले ठप्पै भयो,’ यादवले भने, ‘आगामी चैतमा मात्रै अव सिकार सम्भव होला जस्तो छ ।’ आरक्षले आसपासको बस्तीका मानिसलाई लक्षित गरेर सेनासँगको सहकार्यमा क्वारेन्टाइन पनि बनाएको थियो । सिकारी आएमा सुरक्षा प्रबन्ध मिलाउन आरक्षले काम गरेको हो ।अधिकांश सिकारीहरू युरोप र अमेरिकाका हुन्थे । उनीहरू हेलिकप्टर लिएर सिधै ढोरपाटन पुग्ने गर्दथे । गत भदौमा बाढीपहिरोले सडक बगाएपछि ढोरपाटनमा गाडी चढेर घुम्न जाने क्रम पनि ठप्पजस्तै छ । सिकारका लागि हिमालयन सफारी, ग्लोबल सफारी, नेपाल वाइल्ड लाइफ एडभेन्चर, हिमालयन आउटफिटर, ट्र्याक एन्ड ट्रेल्स र नेपाल वाइल्ड लाइफ सफारीलगायतले सिकारी ल्याउने काम गरेकामा यो वर्ष उनीहरूका गतिविधि पनि ठप्प छन् । ढोरपाटनमा सात वटा सिकार ब्लक छन् । ढोरपाटन हिमाली क्षेत्र भएकाले चितवन, पर्सा र बर्दिया राष्ट्रिय निकुञ्ज जस्तो चोरी सिकार हुँदैन । तर छिटफुट रूपमा काठ र जंगली जनावर तस्कर गर्नेहरू यहाँ पनि सक्रिय छन् ।‘बन्दाबन्दीको समय भए पनि हामीले नियमित गस्ती गरिरहेका छौं,’ ढोरपाटनस्थित सुरक्षा गुल्मका एक सेनानीले भने, ‘घरसारको उपयोगबाहेक बिक्री गर्ने तस्कर भेटिएको छैन ।’ आरक्षको क्षेत्रभित्र बागलुङ, म्याग्दी र रुकुमका बस्तीहरू छन् । केही वर्षदेखि सेना बस्न थालेकाले चोरीसिकार हटेको हो । सात वटा ब्लकमा आरक्षले सेना र संरक्षणकर्मी खटाएको छ ।
READ MORE NEWS
ज्यान गुमाउन पनि टस !
भारतको बिहारस्थित मुजफ्फरपुर जिल्लामा एक अनौठो तर दर्दनाक घटना भएको छ । जहाँ एक दम्पतीले रेलको सामुन्ने हाल फालेर आत्महत्या गरेका छन् ।मुजफ्फरपुरको सकडमा थाना क्षेत्रको चन्दनपटी गाउँ निवासी दम्पती दीपक साह र उनकी पत्नी रिंकू देवीले घरेलु विवाद सहन नसकि रेलको सामु हाम फालेर आत्महत्या गरेका छन्।आत्महत्या पहिले उनीहरुले साथै लगेका छोरालाई छोरालाई घर जान अह्राए । आमाबुवाको आदेश मानेर जब छोरा अगाडी बढेका मात्र थिए, आउदै गरेको रेलको सामुन्ने पहिले उनकी आमाले हाम फालेर आत्महत्या गरिन् ।लगत्तै उनको बुवाले समेत आमा झै हाम फालेर आत्महत्या गरे । यो सबै दृष्य उनका छोराले देखे । लगत्तै उनले घरका अन्य सदस्यलाई बोलाए ।खासमा दीपक र रिंकूदेवीको घरमा पारिवारिक विवाद हुने गर्दथ्यो । दुबै एकआपसमा बाजाबाज गर्दथे । मृतक दम्पतीका एक मात्र सन्तान उनका छोराका अनुसार घरमा बाझिरहेका उनका बुवाआमा छोरालाई समेत एक्लै बाचेर केहि नहुने भन्दै साथमा रेल्वे स्टेशन लिएर गए ।त्यहा उनीहरुले निकै बेर गलफती गरेपछि सिक्काले टस गरे र छोरा बाचेको भन्दै उनलाई घर जान अह्राए । जसै उनी घर जान फर्किए लगत्तै दुबैले आउदै गरको रेलका सामुन्ने हाम फालेर आत्महत्या गरे ।स्थानीय प्रहरी घटनास्थलबाट दुबैका शव पोस्टमार्टमका लागी पठाएको छ । ३६ वर्षीय दीपक र ३२ बर्षीया रिंकूले घर झगडाबाट मुक्ति पाउन आत्महत्याको बाटो रोजेको भारतीय प्रहरीको आशंका छ ।अमेरिकामा बन्यो लघु चलचित्र ‘पुरानो चस्मा’
पाल्पाका पूर्वखोला र बगनासकाली गाउँपालिका बन्द
पाल्पा । समुदायका व्यक्तिमा कोरोना संक्रमण बढेसंगै पाल्पाका दुई स्थानीय तहले आकस्मिक बाहेकका सबै सेवा बन्द गरेका छन समुदायका व्यक्तिमा संक्रमण बढेसंगै चार्डपर्वको बेला हुनसक्ने जोखिमलाई न्यूनिकरणका लागि बगनासकाली गाउँपालिकाले कार्यपालिकाको बैठक बसेर गाउँपालिका कार्यालयसहित ९ वटै वडाबाट प्रवाह हुने आकस्मिक बाहेका सबै सेवा कात्तिक ६ गतेसम्मलाई बन्द गर्ने निर्णय गरेको छ ।गाउँपालिकाले चाडपर्वको समयमा विदेश तथा बाहिरी जिल्लाबाट आउने व्यक्तिहरुलाई पीसीआर परीक्षणको नेगेटिभ रिपोर्ट अनिवार्य साथमा लिएर मात्र समुदायमा घुलमिल हुन अनुमती दिने गाउँपालिका अध्यक्ष कृष्ण बस्यालले बताए ।पर्व मनाउन आउने व्यक्तिबाट संक्रमण फैलिन सक्ने भन्दै ७२ घण्टा भित्रको पीसीआर नेगेटिभ रिपोर्ट सम्बन्धित वडाध्यक्षलाई बुझाएर मात्र घरपरिवारसंग जान अथवा होम क्वोनिटनमा बस्नका लागि गाउँपालिकाले अनुमती दिने भएको अध्यक्ष बस्यालले बताए ।यस्तै पूर्वखोला गाउँपालिकाले पनि जनप्रतिनिधि, कर्मचारी सहित समुदायका व्यक्तिमा संक्रमण देखिएपछि कार्तिक ७ गते सम्मका लागि गाउँपालिका क्षेत्रलाई शील गर्ने निर्णय गरेको छ । गाउँपालिकाले एम्बुलेन्स बाहेकका सबै सवारी संचालनमा रोक लगाएको गाउँपालिकाका स्वास्थ्य संयोजक मोहन ढकालले जानकारी दिए ।बैंक तथा वित्तिय संस्था तथा शैक्षिक संस्थालाई पूर्ण रुपमा बन्द गरेर खाद्यान्न ढुवानीलाई भने बिहान ६ बजेदेखि ८ तथा बेलुका ४ बजेदेखि ६ बजेसम्म मात्र संचालन गर्न दिने निर्णय गरको गाउँपालिकाले जनाएको छ ।यो गाउँपालिकाले पनि बाहिरबाट पालिका प्रवेश गर्ने नागरिकलाई ७२ घण्टा भित्रको पिसिआर नेगेटिभ रिपोर्ट अनिवार्य गराएको छ।
